اكمني بحبك

إكمنى بحبك


إكمنى بحبك وبدوب

وغرامك قدرى ومكتوب

عن حبك أبداً ماهتوب



تعرف إنى إكمنى بحبك

كل الناس حلوين فى عنيا

بشوف الدنيا دى غير الدنيا

زى عروسة فى توب الفرحة

لابسة الطرحة وجاية عليا



إكمنى بحبك لوأشوفك

وخدودك تبعتلى كسوفك

بلون الورد اللى زاينها

بلقاها الأحلام فى كفوفك



إكمنى بحبك لو جنبى

أو تبعد ومعاك روحى وقلبى

بلقانى بكون واحد تانى

وهمومى تروح مع أحزانى

وورودك تطرح على دربى












إكمنى بحبك تتكلم

آه منها شفايفك بتعلم

فنون العشق وجنونه

وفى لحظة وهمسة ليها بسلم












أكمنى بحبك لو تسكت

وعيونك تحكى لى حكاوى

ورموشك عود ومغناوى

نظراتك للقلب مداوى

ولكحل عيونك انا غاوى










إكمنى بحبك لو تضحك

تخضر الأرض رياحين

وخدودك تطرح ياسمين

وتصفى سمايا

ويعلى ندايا

أنا وأنت أجمل حبيبين









إكمنى بحبك بتغير

م الفرحة قلبى بيطير

وأسمع لكلامك وأتأمل

تقولى سامعنى أقول كمل

لو أحلى من حبك شئ

غيرتك أحلى بكتير












إكمنى بحبك ياغرامى

صورتك دايماً قدامى

وحدك ساكن أيامى

لو أفارقك لحظة ياعيونى

ألاقيك ويايا فى أحلامى